Hotels.com最新發表《中國遊客境外旅遊調查報告2013》，訪問逾三千名強國旅客，問到佢哋未來一年期望到訪嘅旅遊點，首位竟然係澳洲，比率係39%，係咪有啲意外？第二位則係獲33%嘅法國，新西蘭以27%排第三。第四同第五位分別係美國同瑞士，比率分別為26%同25%。
香港呢？Sorry，五甲不入囉；係咪香港人得罪咗強國人呢？網民一於好少理，噚日網上為此一片熱烈地彈琴熱烈地唱嘅歡呼聲，仲話蝗蟲飛走晒，一天都光晒，並祝澳洲袋鼠good luck。
八方認為港人唔好太開心住，事關理想同現實，有時好大分別。唔係潑大家冷水，據Hotels.com中國網站2012年酒店預訂情況，強國同胞實際到訪嘅五大旅遊點，係美國、香港、泰國、日本同新加坡喎；換言之佢哋把口說不，身體卻很誠實。
咁又係嘅，去到外國唔識講英文，要封嘴，又點展示強國人霸氣？都係喺香港大大聲聲有feel啲；調查就係佐證，多達42%強國同胞希望更多酒店可以用中文溝通呀。呢個調查結果，相信對香港旅遊業或零售業都有啟示。
mailto:
[email protected]