林敏驄將於下周五及六與胞姊林敏怡在紅館舉行兩場演唱會。
八一年入行至八七年期間,阿驄填了數百首膾炙人口的流行曲歌詞,包括譚詠麟的《愛在深秋》、《霧之戀》及張國榮的《無心睡眠》等,而曾與阿驄合作過的紅星更不計其數,日前阿驄接受本報訪問時大談往昔點點趣事。
阿驄談到與張國榮合作印象最深刻,他說:「當年我畀《藍色憂鬱》歌詞佢時,佢同我講:『點解啲人作詞作得咁好?』咁我咪禮尚往來,讚佢:『點解啲人可以咁靚仔嘅?』我舊年見過佢,我老婆重俾佢電到暈陀陀㖭!」
彈彭健新最渣
而一向鬼馬的阿驄亦經常作弄歌星,他笑說:「彭健新唱情歌最渣,嗰次佢由夜晚七點錄到第二朝四點都未錄完,我咪去拆個鐘落嚟影低個時間,證明佢嘥時間囉!」
至於最老友的要算是鍾鎮濤(阿B),他說:「嗰時我同阿B差唔多日日見,我成日去佢屋企玩,睇住佢識前妻Teresa(章小蕙),我記得有年大除夕,我做音樂節目主持,佢帶Teresa上節目,佢同觀眾講話帶咗份禮物嚟,咁我咪講笑話:『不如𠵱家拆禮物吖!』」
阿倫滾水淥腳
另外,阿驄透露當年與阿倫合作最多,而阿倫錄音是最快的,阿驄笑說:「我喺屋企fax隻《愛在深秋》歌詞去錄音室,轉頭過去錄音室睇佢錄成點,點知去到,佢已經走咗,佢成日好急咁錄完音,唔知趕去邊?」
採訪:馮美茵 攝影:仇志德