樓市第一季尾開始要回氣，不過代理行首季成績表依然標青。
中原集團主席施永青預計，成個集團，包晒香港中原、利嘉閣、中原（中國）同埋其他子公司，收入超過八億元，比起舊年首季，足足多咗一點五六倍，淨係計盈利都有一億。
佢預計，全年可以超過四億，比舊年多七成，計落重多過97年樓市高峯期嗰陣，可以成為集團嘅歷史紀錄。
施老闆話，將中原定位為中國地產代理公司，唔係好似行家咁，只是香港代理，所以嚟緊會更重視中原（中國）嘅業務。內地業務已經有錢賺。
生意額增加，賺多咗錢，經濟環境又好轉，身為七千員工老闆嘅施永青話，賺到錢要點使，都有佢嘅理論，就係將錢分三份，分別畀股東、員工同埋再投資。所以前線營業員底薪已經加咗，至於後勤就出花紅。佢重話，啲大企業賺到錢，都應該加人工喎。

王羅桂華重出江湖
深圳觀瀾湖高爾夫大宅，噚日搞傳媒午宴，見到好耐無露面嘅王羅桂華（圖二右）。
呢位資深地產界人士，自從辭任香港興業旗下華聯興業董事長一職之後，喺恒基中國任職一段短時間，之後就加盟咗駿豪集團，噚日聯同副主席朱鼎健，一齊見記者。
王太舊年12月加盟新公司，做緊觀瀾湖高爾夫球會住宅項目，都係做番佢熟悉嘅內地房地產。
佢話，周不時要返內地，重好落力介紹觀瀾湖嘅環境有幾靚，重話買家要親身去睇吓，先至感受得到，遲啲會請傳媒朋友去參觀。