南豐呢單爭產案熱爆全城,陳廷驊兩個女自然成為傳媒追蹤焦點,細妹陳慧慧俾人影到同男朋友司徒啟瑞搞party跳舞;噚日華華就撞到家姐陳慧芳,孤伶伶一個人喺灣仔新鴻基中心地下搭的士。據聞,佢呢排經常穿梭醫院同律師樓之間,可能頻撲得滯,呢幾日仲感冒病埋,雖然戴住口罩,但係都睇得出佢心事重重。
由於家事已經變成法庭案件,華華知道陳慧芳應該唔想講嘢。最近有人話佢唔畀個妹去醫院探媽咪,華華問起佢,佢果然只係答:「呢啲係屋企嘢,同埋已經入咗司法程序,所以唔方便講咁多。」
關於陳氏家族,華華八多樣嘢畀大家聽,上星期四(9號)陳廷驊外甥何正昂墮樓,原來餘波未了!話說噚日有報紙報道,收到匿名電郵,話何正昂墮樓身亡前一日,佢阿哥曾經去過佢荃灣嘅廠房(即係墮樓現場)同佢嘈交。何正昂嘅哥哥Stephen噚日同華華講,佢已經幾個月無同細佬接觸,由何正昂墮樓至到噚日,佢屋企人都無通知過佢呢個大伯。
李華華
mailto:
[email protected]