細心睇恒生指數，就會發現8月至今一個現象，以日線圖計，出現一支大陽燭後，短線升勢就差唔多停落嚟，唔會有第二支大陽燭接住上，然後冇幾耐之後就出現大陰燭震倉。相反亦對，出現一支大陰燭後，短線跌勢就差唔多停落嚟，唔會有第二支大陰燭接住跌落去，過一排又有一支大陽燭引大家落叠跟衝。呢種趨勢遲早有一日會停落嚟，轉變為一個新方向，只不過，唔知幾時出現。未來嘅日子，偏向chok住整固機會較高。

除非聽日繼續大升幾百點，打破一支大陽燭升完、一支大陰燭跌完嘅格局，否則呢種單日扮轉向，暫時唔需要太在意。由於恒指累積升咗7,000點途中冇大調整，如果恒指出現單日大陰燭，亦好難去搵同大市關連度高嘅股去博撈底，萬一向下急插，多條命都冇命陪，如果繼續糾纏喺熱炒股度，真係人都癲之餘，過一排銀包隨時會少咁截。

離開激烈嘅炒上落戰場，另一個出路係搵慢升股介入，慢升股嘅特點係每日波幅唔大，可以趁回吐時上車，正正因為每日波幅細，股價轉弱亦容易察覺，可避過大市上落嘅雜音。情況一如內地女裝零售商江南布衣（3306）同海底撈湯料供應商頤海國際（1579），幾個月內股價無風無浪翻一倍。小弟鍾情嘅電動車概念股德昌電機（179）亦係慢升狀態，可以睇位上車揸一排，分析後補。

https://www.facebook.com/advanceguy1/