就咁睇呢兩位阿叔，你未必認得係乜水，但睇埋兩位球員時代嘅風采，應該認得啦啩？左邊嗰位就係前巴塞隆拿中場謝拉特盧比斯，右邊嗰位就係前皇家馬德里中場古迪。點解兩位無啦啦會蒲番頭？因為佢哋已經返番舊會培育新秀，仲齊齊造出好成績！首先講吓38歲嘅謝拉特盧比斯，呢位2000至05年效力巴塞嘅中場踢到2011年掛靴，之後教過加泰隆尼亞「國家隊」，2015年喺巴塞B隊由西乙降班後走馬上任，結果花咗兩季時間終於一洗頹風，周日升班附加賽次回合同桑坦德踢成0:0，兩回合計贏4:1，再次重返西乙啦！

至於現年40歲嘅古迪就喺2012年正式宣佈退休，翌年開始擔任皇馬青訓工作，到咗今季帶領皇馬U19先後贏得所屬聯賽（Grupo V of the División de Honor）同埋另一盃賽（Copa de Campeones），周日再喺加時以4:1擊敗馬德里體育會贏埋青年組西班牙盃，歷史性實現三冠王！兩軍第二梯隊同後生仔都咁勁，過多幾年分分鐘喺一隊有排鬥！