【新增動新聞】
洲際盃周六進行A組最後一輪分組賽，葡萄牙雖然不敗已經夠出線，不過對同組魚腩新西蘭，仍排出強陣，基斯坦奴朗拿度（C朗）、貝拿度施華、米基爾施華及拿尼各建一功，以4:0大勝，7分首名出線；東道主俄羅斯表現失望，以1:2不敵墨西哥，墨西哥次名出線，俄國就同新西蘭齊齊出局。

雖然2戰4分在手嘅葡萄牙，今仗對新西蘭保不敗已經夠出線，不過為了爭首名出線，賽前傳出會休息嘅皇馬前鋒C朗仍然正選掛帥，與轉投AC米蘭嘅米基爾施華合作雙箭頭。葡軍上半場已圍攻新西蘭，雖然C朗兩度頭槌攻門失機，不過到33分鐘葡軍中場丹尼路彭利拿博到12碼，C朗主射建功，連續兩場有入波。4分鐘後，葡軍左閘艾利素傳中，新一季轉投曼城嘅貝拿度施華近門撞入，為葡萄牙半場輕鬆領先2:0。

換邊後葡軍收起有傷的貝拿度施華，以及C朗，仍然可擴大領先，80分鐘米基爾施華單刀射入，加上拿尼補時階段入球，葡萄牙以4:0大勝，鎖定首名出線資格。

俄羅斯另一場在喀山主場出擊面對墨西哥，雖然有中場森美杜夫先開紀錄，但客軍被中堅尼斯達阿拿祖半場前追平1:1，換邊後，俄軍門將艾堅菲夫派大膠，墨軍由夏榮羅辛奴建功，以2:1反勝，雖然墨西哥與葡萄牙同得7分，但得失球不及葡軍，以次名出線，俄羅斯就陪新西蘭齊齊出局。