獨（毒）到一個點嘅綠葉王戴耀明，最近被睇中喺大陸劇《爆裂老婆三歲夫》中擔正做男一，除咗工作受到注意外，連帶感情亦都受到關注。

小明曾經喺訪問講過，03年同阿佘拍完《金枝慾孽》後做咗好朋友，佢試過同阿佘講，話將來搵到錢要娶佢做老婆，又試過飲醉酒send短訊示愛話好掛住佢，事後佢話呢啲只係講笑嘅說話，不過佢都大讚阿佘係珍品。（新聞連結： http://bit.ly/2jYsflM ）

日前小明喺銅鑼灣接受訪問，提到呢單嘢，問阿佘有冇找佢晦氣？小明哈哈大笑話：「笑吓囉，不過有生命危險，唔再講……佢太完美喇！」

唔講人哋，咁就講番自己，如果以為小明冇拍過拖嘅話，就大錯特錯！查實喺13年，小明曾經被《蘋果》影到拖住女友行街街，但係呢段情喺今年年初結束。

講到追女仔方面，小明話：「梗係會追，我唔係精神病，我覺得幾毒都好，都要一個伴侶。唔係話要講衰嘢，就算啲朋友幾friend，點都唔夠同自己嘅女朋友嘅枕邊語，呢個人唔可以長時間冇，心理會唔係好平衡！」

係身為一個「毒男」，係被動等女追定主動出擊？

小明話：「我係會出擊，毒唔晒，我都會享受自己一個，亦好享受同朋友，多方面，365日都咁毒，要睇吓醫生，搵番啲正常社交。」

擇偶條件方面？

小明坦言：「以前細個梗係要睇樣，但係o依家心態唔同，又正又夾有邊個唔想？邊有咁完美？我鍾意啲爽，唔要公主病，溫柔時候可以好溫柔，但係亦可以好man，呢啲最正，我係求伴侶行到老。」

呵，一生一世嗰種。

家陣小明嘅事業版圖拓展開去，北上拍劇，選擇當然多咗，唔知目標又出現咗未呢？佢話：「冇喎，識女仔真係多咗好多，好似大陸啲女仔對香港男人有一份情意結，唔係因為錢嘅問題，個感覺好似係香港啲男仔，都希望一生人同㗎妹一次，有呢個情意結。」

小明仲話自己有一個願望：「做人只係得幾十年，o依家都40幾歲，唔知仲有幾多年，乜嘢都試吓，前面係絕路，希望在轉角。我希望一生人去勻咁多國家，環遊世界係我嘅大夢想，最好係同伴侶兩個人去，唔使刻意就。」

（仲有一篇講獨男如何度過漫漫長夜）

採訪：何慧斯
場地：RedMR 紅人派對@皇室堡