煲呔上京述職，今日開始重頭戲，下晝去見胡總，聽日見溫總。近期孫公直資混賬問題未去到煲呔身上，大批返港人倫敦滯留嘅怒火仲發展緊，煲呔近排未有負面議題纏身，話唔定阿爺仲要攞香港亞運奪金嚟做開場白，比起澳門特首吹水安要解釋派完錢仲有千幾人上街遊行抗議，煲呔應該輕鬆好多。八方仲記得當年老董落台之際，煲呔吹口哨被批輕佻，所以冇乜壓力往往就係出事嘅時候。
煲呔噚日馬不停蹄先後拜會外交部同中國銀監會，同外長楊潔篪會面約近1小時期間，傾到馬尼拉人質事件，煲呔唔問外交部有冇施壓唔准菲律賓代表出席諾貝爾和平獎頒獎禮，而係好識做，係咁感謝中央政府出手相助，仲話如果冇中央幫拖，阿奎諾三世就唔肯聽佢支笛展開調查。

頭耷耷望iPad

禮尚往來，楊潔篪就讚煲呔過去一年喺對外交往方面有成就，外貿同投資都有增長，似乎係幫煲呔平反，暗指佢喺國際間都有人識得，所以阿奎諾三世冇理由話唔知邊個係煲呔。
煲呔近排好落力玩IT，近期去立法會已經改用潮人必備嘅iPad，用手指「篤篤吓」代替揭紙。噚日煲呔繼續扮潮，攞住部iPad同楊潔篪見面，發言時仲不時耷低頭望住iPad，唔知仲以為佢一路開會一路上網或者睇片。大家如果心水情都會發覺，大多數鄭重嘅官方會面場合，都唔會見到主要人物攞住部電腦或者電子板喺度睇睇吓、篤篤吓嘅。

用貓紙更實際

據聞煲呔噚晚同國家副主席習近平撐枱腳食飯，跟住重頭戲接住落，今日下晝見胡總、聽日見溫總，其間仲會首次正式拜會港澳辦主任王光亞。經過頭兩日冇乜壓力嘅活動之後，八方開始擔心佢會繼續攞住部「玩具」走入中南海，事關iPad嘅手寫輸入，好容易會因為寫得太潦草而出咗其他字。奉勸鍾意抄書嘅煲呔，最好用番白紙黑字嘅貓紙好過，以免做唔成潮人反而再衰輕佻。
mailto:[email protected]