工黨新界西立法會議員李卓人喺荃灣嘅議員辦事處今日開幕，面積約一百呎左右，月租$7500。阿人話，荃灣乃係新西咽喉地，所以要喺呢度開辦事處、尤其譚駿賢喺新一屆區議會於屯門區當選後，自己喺屯門嘅議辦，就變成與譚合租，所以有空間喺荃灣區再搵地方開多個議辦；連同天水圍嘅議辦，佢宜家有三個議辦嘞！

今日開幕禮上，有街坊非常有心，送咗對聯俾佢賀一賀：「卓爾不凡排難解紛，人揚公道正義長存」。阿人當然非常like，仲話呢副聯巧妙之處係，將佢三兄弟個名，全部包含其中噃。原來阿人有三兄弟，佢最細排第三，大哥、二哥分別叫卓爾同卓凡。