香港作為商業社會，市場推廣是每年畢業生的熱門投身行業之一。投身marketing行業已有10年經驗的Michael（梁顥臻）及Derek（吳兆陽），創立了以marketing為主題的facebook專頁《我做Marketing》，當中內容有正經有幽默，讓人可以一窺行業狀況及得到共鳴感，受到不少網友支持。《青雲路》在6月尾舉辦《職場大贏家》免費講座，便找來Michael作嘉賓，為想加入marketing的新鮮人作分享，讓他們事先了解行業狀況，從而找到進入市場推廣行業的致勝見工路。

Michael及Derek是facebook專頁《我做Marketing》的創辦人，同時他們在市場推廣界也有10年以上的工作經驗，現時Michael在廣告公司擔任策略及創意總監，Derek則是一間活動策劃公司的高級市場推廣部經理。Michael說︰「現時page上面嘅內容都由我哋寫及創作，內容分享有關marketing嘅動向，仲有工作上嘅所見所聞，有感而發都會寫，每日都要用2至3個鐘去管理個page。」

憑着多年的工作經驗，及在專頁累積的人氣，他們不時受邀到學校及公司舉行職場講座，Michael說：「對於想入行嘅新人，我會講要贏人，要先識market自己。如果連自我介紹都做得唔好，都好難說服到個面試官，你可以做得好marketing呢份工。最基本係喺面試前，要先了解公司嘅主要業務及廣告客戶，然後present自己有乜嘢優點配合到公司嘅發展及要求，好嘅表達技巧都唔少得。」

Marketing啱自己
Michael修讀電腦副學士，00年畢業後加入了廣告製作公司做有關電腦設計的工作，「喺工作中，我接觸到做廣告相關嘅人士，慢慢接到有關digital marketing嘅freelance，例如網頁設計、整flash短片，發覺呢行好似幾啱我，而且有發展潛力，之後我仲半工讀咗個marketing degree。」

07年，Michael全職投入marketing界，加入了一間活動策劃公司，同時認識了剛從中大社會系畢業的同事Derek。Derek說︰「公司主要搞B to B嘅商業展覽，我哋嘅工作會係book場地之餘，仲會搵參展商、嘉賓及潛在客戶，每星期都有活動，都幾忙碌。不過每次成功籌辦好一個活動，都好有滿足感，覺得呢行好啱我，所以決定喺呢行發展，喺公司認識到Michael，大家都幾啱傾。」

開專頁分享見聞
其後Michael及Derek雖各自轉了不同的公司，但因志同道合而成為朋友，在15年更一同創立了《我做Marketing》的facebook專頁。Micheal說︰「做咗一段時間marketing，每日都遇到唔同嘅事，有開心，有氣憤，積積埋埋好想有個地方同都係做緊marketing嘅人士分享，搵共鳴。於是開咗《我做Marketing》嘅facebook page，將工作上遇到嘅苦水、見聞、笑位，同大家分享。」

Michael表示原先開設《我做Marketing》的專頁只是隨心之舉，但隨着觀看者人數增多，為他們帶來不少機遇。「經營個page3、4個月後，follow嘅人數愈嚟愈多，竟然有出版社主動幫我哋出書，最後籌劃咗9個月時間，喺16年出咗我哋第一本書《我做媽劇停》。個反應好好，第一版喺1個月內賣晒，之後仲有公司、學校認識到我哋，邀請我哋去做職場分享嘅講座，及有關marketing嘅training。」

與網友互動
雖然管理專頁要額外花費精力，但Derek表示與網友間的互動，讓雙方都有得着，「會有網友inbox我哋問職場意見，試過幫人改CV。亦有人問轉工嘅問題，究竟留喺原公司，定轉去A或B公司好，我哋會引導佢用多個角度思考各個選擇嘅利弊，令佢可以作出適合自己嘅選擇。喺一段時間後，收到佢嘅訊息話聽完我哋意見後轉咗新公司，現時工作得好開心，多謝我哋。呢啲同網友間嘅互動，增加咗我哋繼續搞個page嘅動力。」

現時《我做Marketing》約有3萬多followers，Michael及Derek表示想將個page經營得更好，「嚟緊內容會更多元化，除咗係寫作形式嘅變化外，亦會嘗試用唔同嘅表達形式；有計劃出第三本書，目前仲係籌劃階段，希望會有更多人支持及鍾意我哋個page。」

後記︰放工後的努力
看到Michael及Derek憑着一時興起創立了《我做Marketing》的專頁，去到現在略見成績，記者腦海中已立即想到開個《我做reporter》的專頁，但冷靜過後，想到日常管理需要的時間及心機，對於放工只想hea的記者來說，成功沒有幸運，只有努力及付出，才能得到。

搵好工，即上 http://www.ecjobs.com.hk