盧海鵬喺亞視處境新劇《十六不搭喜趣來》中，一人分演六角，除咗影射陳志雲嘅「陳智能」造型曝光外，佢仲會玩盡政界風雲人物，例如新舊特首曾蔭權同董建華，但最令人噴飯莫如反串扮政壇鐵娘子，包括唇上黐大粒癦兼藐嘴、扮影射葉劉淑儀嘅「聶尤淑如」，仲有笑到四萬咁口、影射陳方安生嘅「吳方安心」，至惡梗係鵬哥着裙露飛毛腿，確係好鬼好笑。

鵬哥話佢唔使特登歪嘴扮葉劉淑儀，因為佢諗到呢個人，就會自自然然上身，講對白就不期然嘴歪。鵬哥大前日第一日開工，先模仿《志雲上素》拍攝《智能藥膳》，其實呢齣劇仲有唔少挖苦無綫嘅情節，老翻王賢誌、鄧健泓同崔建邦鬥傍陳智能只係小部份，馮仁昭聽聞吳浣儀扮影射六嬸嘅「江月霞」，會講佢喺辦公室開會時，省到班高層立立令。
劇中又有大班「紅星」登場，寶珮如分飾兩角，扮女高層「陸易寧」同扮影射容祖兒嘅「童好如」，有講B哥鍾鎮濤嘅「C哥」梁皓楷、影射側田嘅「滄田」秦啓維、似劉德華嘅「牛華」蒲進，同似Leon黎明嘅「Zion」周子濠，基本上似足無綫《娛樂插班生》，但監製楊紹鴻否認抄橋，亦唔認同係cheap：「點解大台就唔cheap，亞視就cheap呢？畀個機會亞視做好啲啦。」