馬會今季再搞超新星選舉，讓馬迷投票選出心目中至愛。其中深得民心的「戰利品」第四場在最佳拍檔韋達胯下出戰新馬錦標，冇令粉絲失望，按韁以大超班姿態大熱捧盃，全程未見韋達開過一鞭，惟頭馬時間卻快至1分21秒62，快過一班賽標準時間，本身累積出道五戰三冠兩亞全入Q，極有機會成為今季最受歡迎超新星。
至於韋達季內雖與蔡約翰大幅減少交易，但近期逢並肩作戰卻例贏大賽，早前先憑「精彩日子」勇奪香港一哩錦標，昨午再以三班馬「戰利品」揚威獎金屬一班賽的新馬錦標。今場跑第二、三為「好加加」及「點解」。回說超新星選舉，元旦日將有另一蔡廐的「品學兼優」登場，如無意外將配韋達跑二班1600米，有力再助騎練攞威。