鄭俊偉喺元旦賽日有得有失，頭場大熱「悅悅友福」喺亮相圈時，鄭俊偉以不適當用語同動作，對待搞錯配備嘅馬房手足，被董事捉到正兼罰一萬蚊。慶幸「金剛仔」成功爆冷，贏番場馬同搵返啲獎金幫補。練馬師對手下粗聲粗氣，鬧馬房員工同騎馬人，其實係由來以久嘅馬房文化，米高鄭今次斷正只可以話唔好彩。

馬房一直都有好重階級觀念，練馬師唔滿意就鬧副練，副練就鬧下面，一層一層壓落去。好多練馬師以前做副練或更低職位時，都習慣晒被阿頭爆粗問候，到佢哋自己做阿頭時，好自然亦有鋪唔啱就鬧人嘅癮。

練馬師鬧自己馬房員工真係小兒科，過去亦有練馬師鬧獸醫被罰，唔只華籍練馬師，有部份外籍練馬師一樣好大脾氣，鬧手下唔使本。時代唔同咗，以前嗰輩被阿頭鬧幾句，大部份都唔出聲吞咗佢，家陣新一代未必係咁諗，被阿頭無理話多兩句，唔還拖就勢係假。

不過，有部份新一輩練馬師，對手下嘅態度就非常好，馬房要做出成績，成個團隊上下一心好緊要。馬房員工係受聘於馬會，係由馬會委派跟邊個練馬師，有得揀嘅話，人人都想去大摩、阿蔡同告仔等大倉，因獎金都分多啲。馬房員工某程度上係同工唔同酬嘅崗位，有時上下有磨擦無可避免，今次米高鄭事件非冰山一角，馬會都應該諗諗，點改善現行嘅馬房管理。

阿Joe