華華噚日講到「老許」許照中俾耀才「滴」死，提到富昌證券總經理藺常念話唔減佣無飯食，唔知係咪唔講猶自可，講起把幾火，搞到藺Sir要即刻整個「醫貓」畀華華「數一數」耀才！
藺Sir封「醫貓」係咁寫嘅：「我想回應富昌只能向前看面對競爭回顧前塵往事耀才曾經兩年前登報紙把經紀評為腫瘤但今天耀才上市後計劃開20間分行還要大量請經紀是否這些經紀需要接受化療醫好腫廇才可當經紀」全程一個標點符號都無，就連上款「蘋果日報財經版」都寫錯成「蘋果日報財經板」，好似一副撩交打嘅格局！
藺Sir話，其實佢只係想同華華分享耀才往事咋，佢問華華記唔記得喺06年證券行連環爆煲嗰陣，當時耀才唔做散客生意，於是大賣廣告，話啲經紀係腫瘤，今日耀才上咗市走大眾化路線，就諗住開20間分行兼高薪挖角，所以佢咪覺得去耀才打工嘅經紀，係咪需要接受化療醫好腫瘤先入行囉！