復活節長假期間，市場吹起頗淡的風，昨日港股復市，以為難逃一劫，偏偏世事難料，港股在中移動（941）及滙控（005）力撐下幸保不失，表現算是中規中矩。
似乎指數只是靠兩隻重磅股托住，後市仍要看多一、兩天，特別是要留意中資股的表現，因為昨日A股及H股指數走勢仍然疲弱，資金流向的趨勢仍未似大舉入市。
還有一點，就是月前睇淡港股之時，其中的一個憂慮是日圓反彈的拆倉影響，可能仍要持續，因為美元兌日圓在過去數天已反覆回落至92水平，不可不防。
昨日最多人同筆者講的說話，只有兩句：（1）全市場得你睇好；（2）澳門贏錢喎。

方向未明　暫宜觀望

真係要多得《蘋果日報》同李華華擺在下上枱。其實「人人睇淡我睇好，又或人人睇好我睇淡」的情況經常有之，但《蘋果日報》的威力確實非同小可，經其一報道，就通街都知。記得年前有一篇報道話筆者喜歡食朱古力，結果這兩年過時過節，筆者收到的禮物只有朱古力。
至於過澳門度假，其實已是筆者的例行公事，每逢長假期皆與太座過江一遊，順便視察各賭場的營運情況。故此，筆者對賭業股的走勢預測頗為準確，有雜誌基本上每季都找筆者評論濠賭股的表現。
筆者的學生及Fans大部份都知道此習慣，實不足為奇，可能華華在假期冇嘢好寫，惟有擺我上枱罷！不過，在澳門只是小注怡情，但在「300萬爽組合」要贏肥佬黎錢就好認真，正如周顯話齋，白寫了一季的稿，點都要本利歸還。只要個市行得到大單邊，就有機會。
回說大市，這兩天仍以不變應萬變，等待方向確認，暫不用心急，繼續保持適量貨底便可。

沈振盈
證監會持牌人士