亞洲亞洲今日喺大埔總台舉行捐血活動，不過大家嘅焦點，都係落喺亞視面臨破產，冇糧出，同埋盛品儒家族出資兩億幫佢哋向亞視董事之一查氏兄弟還款。

今日亞視唔止搞捐血活動，仲開埋員工大會，由執董葉家寶向大家派定心丸穩定軍心。三點左右開會，五點散會。出到嚟，助理副總裁冼偉智話:「所有嘢都解決晒，唔會清盤，前境明朗，只會有更多投放，總之一定唔會清盤，成件事告一段落，製作會繼續，資金充裕!」

問冼偉智驚唔驚影響士氣？佢話:「唔會，我都係由低做起。」談到有藝員搵羅霖傾想解約？冼偉智再謂:「我真係冇聽過。」是否有藝人約滿後自動流失？佢就話:「唔會，視乎佢哋嘅工作啦。總完約前60日至一個月先傾。」咁劉錫賢呢？佢話:「安排緊。肥哥哥做咗咁耐，我哋一拍即合啦，佢個額頭鑿住亞視兩個字。」

言下之意，是否會簽番劉錫賢？冼偉智只係話:「理應係。」會加人工？佢話:「唔關事0架喎……呢啲係根據表現調整0架嘛。」唔關事？

提到葉家寶安定軍心，鄭伊娜好開心咁話:「係呀，家寶話聽日出糧，好開心!相信公司解決問題，前境明朗，我聽日第一時間打簿。」

至於六合彩之子蔡國威就話:「學家寶話齋，黑暗時間已過去了，期望公司多啲製作，多啲劇集，等大家唔使睇唔想睇嘅劇集啦!」