鍾嘉欣成為人妻兼人母之後，昨日終於返到香港喇！昨晨約6時，嘉欣由溫哥華飛抵香港，半百傳媒一早在機場等候，見到多張熟悉的面孔，嘉欣即合十，第一句便說：「咁耐冇見大家！好掛住大家！」
嘉欣一個人推住一大一小行李篋，戴住黑超、身穿深藍色長褸現身，雖然完全遮蓋着身材，但她明顯已收身不少，面尖尖跟以前一樣。笑容滿臉的嘉欣企定定讓傳媒影相，又應要求展示婚戒，她透露有為囡囡Kelly餵人奶，她說：「辛苦得嚟好有滿足感，所以都唔係好辛苦。」問囡囡樣貌像誰？她說：「兩個（爸爸媽媽）都似。」再問湊BB有甚麼蝦碌事發生？嘉欣笑言：「暫時都冇嘅！小朋友兩個都黐。」

返家搞清潔

今次嘉欣返港不是為拍劇，而是出席今晚於中環舉行的Emporio Armani Remix別注系列開售活動宣傳，亦是她產後首個公開活動。嘉欣透露此行脊醫老公Jeremy和BB都沒有隨行，問會否帶BB來港？她說：「會有機會嘅，將來有機會。𠵱家返嚟就休息吓先，安定吓，有時間就搵吓啲姊妹。」據悉嘉欣出席完活動後，隨即會飛返加國湊女。問現在有否掛住囡囡？她笑言要留待活動上再傾。問現在是否已收身？她說：「回復番少少，但都爭少少，冇努力收身呀，哈哈，我唔想俾人打，但自己湊會快啲收身。」
之後嘉欣由經理人等人陪同返回位於將軍澳寓所，落車後，她鬼馬地說：「因為太耐冇返嚟喇！要返嚟睇吓間屋，搞吓清潔，暫時都唔會出去㗎喇。」她還一邊講一邊做出清洗動作，又不斷向現場傳媒揮手講再見。
採訪：羅慧敏
攝影：陳順禎、黃曉程