徐雨石馬房隻「雷公鑿」列陣本周三(11日)快活谷第五場三班1650米，此駒經季初一輪熱身同減分後，狀態開始冒勇，一連三場田草1600米都追得接近，元旦日仲跑到殿軍，只輸畀頭馬「金剛仔」四分三個身份，喺香港跑咗七場，初次收到獎金。

不過，現評60分嘅「雷公鑿」今次唔跑田草，亦唔跑四班賽事，居然首次到快活谷，角逐三班1650米，呢個舉動都令人幾意外。

「雷公鑿」馬主貝鈞奇表示，愛駒繼續跑三班係想負輕磅，唔使咁辛苦，至於轉場初跑快活谷竟然係無心插柳，貝鈞奇說：「『雷公鑿』報名時喺馬房第二志願，本諗住做後備攞保護權，估唔到同廄侶『財寶家駒』一齊做正選，既然係咁，就索性測試『雷公鑿』嘅快活谷性能，機會方面抱觀望態度，拖做腳都無妨。同場『鋒芒畢露』、『琪麟穎』同『勝利名星』都好有份量，『雷公鑿』要過佢哋唔容易。」