導演羅倫艾默烈治（RolandEmmerich）開拍《天煞地球反擊戰：復甦紀元》（IndependenceDay:Resurgence），今次香港女星楊穎（Angelababy）飾演戰鬥機機師Rain，而且戲分不輕，令佢進軍國際又成功跨進一大步。

Baby噚日孖住導演羅倫艾默烈治出席《天煞2》嘅北京首映禮，同Baby並肩作戰多年嘅經理人Kim接受本報記者訪問，談到接拍《天煞2》原來都係一個好難得嘅機緣際遇。據Kim表示：「早喺《天煞2》選角時，Baby獲選角導演邀請參加試鏡，適逢咁啱要飛去美國，喺十分幸運嘅安排下，竟然順利同導演親自面試，Baby老實話都係早前才欣賞96年嘅《天煞》，呢次過程令導演對Baby印象唔錯，仲覺得佢好可愛。」Kim返到香港之後，竟然收到美國電影公司通知消息，當得知Baby被選為要角之一後，Kim形容當時心情真係好開心。

Kim透露拍攝過程相當順利，亦大開眼界，Kim表示：「荷李活製作真是令人佩服，每位員工及崗位都好專業。」二人偕同英文老師兼助手，都有趁留喺美國時到洛杉磯觀光。不過第二次從香港出發赴美時就發生一段緊張經歷，佢哋喺上年7月底前往洛杉磯時，由於機艙內探測到煙霧，機長為安全起見，飛機臨時轉飛往位於阿拉斯加Aleutians島嘅Shemya軍用機場，幸好航機安全着陸，總算是有驚無險，但就花了48小時才到達目的地。

成功打開國際市場，Kim承認目前都有不少荷李活電影邀請Baby演出，目前會睇完劇本及時間再決定接拍與否。