周柏豪同連詩雅（Shiga）今日喺旺角出席麥當勞活動兼向途人派發汽球，吸引大批市民圍觀。今日有報導話，澳門民政總署將於五月一日舉行「黑沙海灘迎夏日演唱會」，對澳門人而言個演唱會就等同「免費維穩show」，因為五．一當日會有唔少市民上街遊行，依家搞個咁嘅演唱會，根本就係想削減當日上街嘅人數。

問到有份「被出席」嘅周柏豪點睇呢件事？佢即話自己讀得書少唔識政治：「工作係公司安排，歌手有機會唱歌係開心，亦等如有工作，自己覺得係一個同歌迷見面嘅機會，我讀得書少唔識政治，呢啲都係交俾公司處理。」

問柏豪是否不理會活動係咪同維穩有關，只要係工作就會照做？柏豪就話：「首先我唔知咩係維穩，自己真係唔識，但相信公司衡量過ok先接，就算下星期自己要出席咩活動，我都唔會多問。」

講到早前有報道話柏豪搶贏陳冠希，成某牛仔褲品牌代言人，柏豪坦言係接咗個廣告：「呢排係多咗廣告，真係好開心。之後仲會返內地半個月，同Shiga拍一套黑色幽默嘅愛情片。」柏豪仲爆Shiga戲內會以旗袍look示人，但試造型當日，Shiga著咗套旗袍上身之後，即被導演嫌棄佢身材唔夠好，晾唔起件衫，喺柏豪身旁嘅Shiga就話：「導演話我可能要搵番啲舊式嘅內衣去著，因為件內衣有分半杯、全杯同3/4杯等等，不過自己一定會揀最大嗰個，因為著唔到都可以塞入去墊大啲！」Shiga仲話到時大會見到佢個造型，一定會有驚嚇噃！