鄒凱光(灘叔)、馬浚偉、Robynn&Kendy同卓韻芝呢班超齡學童,噚晚喺銅鑼灣出席ViuTV節目《同2047特首上學去》嘅謝師宴,灘叔、R&k同卓韻芝都有着住畢業袍影相,代表佢哋真係正式畢業喇,反而馬仔一個人着住便服,佢話:「我要留班喇!」
試咗7日小學生活嘅灘叔就讚啲小朋友捱得,叻過好多成年人,又話啲跨境同學每日都好似打仗咁:「佢哋都辛苦,5點起身,又要過關又要轉車,可能啲學生習慣咗。我細個媽咪都唔理我,由土瓜灣行去紅磡,佢仲覺得行得多對身體好啲添。」
如果ViuTV再搞多次叫佢返學,佢又肯唔肯呢?灘叔笑道:「咁不如去麻雀學校,再做想做啲職業性嘢,酒店、醫院、大學,有新鮮感。」呢排小三TSA咁多人話令到學生壓力大,原來灘叔都有試過做,佢話:「有,自己試過都抹晒汗先做完。」
咁灘叔儲夠經驗,佢會唔會開戲講吓學生?灘叔笑住講話:「五個校長爭一個小孩?」佢繼續笑笑口話:「我本性都憎小朋友,會開虐待佢哋嘅戲啦,冇《五個小孩》咁溫馨!」灘叔讚完學生再讚ViuTV將普通人拍成明星咁,好有新鮮感喎。
依家興素人吖嘛,香港冇明星㗎喇,有都上晒大陸啦!