今晚日本樂壇天后安室奈美惠兩場深圳演唱會開鑼，不少歌迷一早到場排隊搶購限量商品，由於深圳係安室嘅告別騷唯一中國站，所以吸引中國各地歌迷支持，仲有大量專程越洋捧場嘅日本歌迷。

深圳體育中心場外，符合國情，有老翻產品售賣，亦有賣螢光棒嘅小販，雖然有手執警棍及盾牌嘅保安人員駐守，但黃牛黨仍然張揚兜售門票，甚至喺保安旁邊兜客，現場不少黃牛都表現焦急出讓門票，有人上前向記者表示可減價放飛，似乎有大量飛炒燶。

至於每位觀眾進場時亦要通過安檢，並要過金屬探測器，觀眾亦不可帶樽裝水等液體、或火機等易燃物品，但仍有觀眾輕易帶火機入場。

更離譜嘅係，場內有人戴住pass賣簽名CD——係假簽名CD！