看八卦雜誌的不只八卦師奶，問心，平時路過書報攤，縱使不買，斷估你也總會駐足觀看一排精采周刊雜誌封面，尤其是一些低像素粗微粒、不看標題不知相中人是誰的偷拍照，就特別吸引。早前香港法律改革委員會向立法會提交有關禁止偷拍的議案，身為消費者的你會否贊成？沒飛釘沒禿頭沒露底沒偷情沒M字額，你還會買八卦雜誌嗎？

記者：曾冠輝　
攝影：楊錦文

賊喊捉賊

做街訪，基本上個個被訪者都話立法有理，再問有否心目中的經典偷拍，卻人人有不同答案！聽清楚，是人人有「不同答案」，即人人「有答案」，反對偷拍卻愛看偷拍照，很有賊喊捉賊Feel，唉！香港人，包括我和你在內，就是這樣的了，針刺不到肉，不知痛嘛。

問題

Q1.是否支持立例禁止偷拍？若立例禁止偷拍，還會買八卦雜誌嗎？
Q2.有否看八卦雜誌習慣？如有，喜歡看甚麼？
Q3.請選出一個近期最經典的偷拍故事。

Wingo

Q1.梗支持！明星都有私隱㗎嘛！會繼續買，仲有其他八卦新聞好睇㗎嘛。
Q2.有，鍾意睇女星新聞同性感照，有啲封面都幾吸引㗎。
Q3.黎明同樂基兒又咀又摷嗰段新聞喇，肥姐戴假髮都幾經典。

Terry

Q1.支持，公眾場合就話任影啫，私隱唔應該影。會繼續買，唔一定要睇偷拍嘢㗎嘛。
Q2.有，偷拍嘢講真……又真係幾過癮嘅。
Q3.「樂基兒吸乾黎明」嗰單啦，條封面大題起得好抵死。

Harry

Q1.支持。我諗都會買嘅，就算立法之後真係少咗偷拍嘢睇，都可以作啲抵死嘢出嚟引人買嘅啫。
Q2.有，不過我比較鍾意睇有關音樂嘅嘢多啲。
Q3.我會揀黎明同樂基兒嗰幾段新聞。

成先生

Q1.支持，明星都係人，私隱都應該得到保障。
Q2.無，我對潮流明星都無興趣。
Q3.側田M字額、黎明同樂基兒嗰單都幾離譜。

Natalie

Q1.支持，立法有阻嚇作用。會買少啲，啲封面一定無咁多嘢睇喇。
Q2.有，鍾意睇得意嘢同埋啲明星緋聞。
Q3.側田M字額，嘩，估唔到佢頭殼頂真係好似地圖咁花。

BoBo

Q1.梗係反對啦，禁咗咪無嘢睇，做得藝人就預咗俾人影㗎啦。都會繼續買嘅，不過肯定少咗嘢睇囉。
Q2.梗係有啦，我最鍾意睇明星緋聞。
Q3.鄭伊健屋企睇鹹碟囉，伊健係我偶像，真係有無搞錯。

近期經典偷拍

天王新女親熱照

封面標題有「伸手摷」、「啜波」超露骨等字眼，嚴重侵犯私隱，不得不佩服狗仔隊精心部署和編輯們起題的心思。

側田半禿頭曝光

側田出道至今一直戴帽示人，當大家估計他會否在演唱會除帽之際，狗仔隊已為各位解開箇中玄機，拍下他除帽真面目。

梁榮忠車震事件

《殘酷一叮》播出後梁榮忠人氣再度急升，自然成為狗仔隊偷拍目標，車震斷正後被傳媒冠以「賤男」之名。

肥姐真面目曝光

肥姐脫掉假髮後面相頭形原來激似佛祖，不知何時開始，明星名人的頭髮成為了狗仔隊的頭號追擊目標。

狗仔隊由來

「狗仔隊」一詞源自意大利語「Paparazzo」，兩詞皆有貶義，專指一些追逐名人並進行偷拍、以報道名人私生活及負面新聞圖利的的攝影記者。1990年，《壹週刊》引用外國「狗仔隊」的貼身追蹤方法揭本地名人私隱，對象由政界商界人士到娛樂圈明星都有，採訪手法一直受各界非議。不過非議還非議，多得狗仔隊的偷拍照帶給讀者無窮歡樂，有樂隊更作曲明鬧暗諷狗仔隊，LMF的粗口歌《冚家鈴》與MP4的D場歌《娛樂零零狗》曾幾何時唱到街知巷聞，外國還拍了套電影《Paparazzi》（中譯《狙殺狗仔隊》），講述主角及其家人如何受到外國狗仔隊滋擾，逼得男主角要進行連串反擊。