曾志偉、劉心悠、導演黃進、農夫今日係灣仔利東街出席奇華餅家八十週年慈善活動，志偉和心悠分別代表不同系列宣傳。

志偉為奇華做代言人廿三年，係佢演藝事業最長一個代言人工作， 佢話：「好難得，都唔係講錢問題，邊個捧紅邊個都唔知，互相幫助打出知名度，第二啲客一早換咗後生啲嘅人啦，但佢對我不離不棄，頭先嚟到仲話畀個label我貼住，我話唔使喇，見到我個樣已經係品牌。」多年合作志偉已全家上下拍攝，包括仔、女、媽咪都參與過，新一輯中秋廣告會於後日拍攝，志偉話：「近年都冇全家總動員拍，只係大前年同囡囡(曾寶儀)踩單車，我兩個孫女分別五歲同十七歲，但唔會出鏡。」

志偉早前喺加拿大同三哥苗僑偉慶祝60大壽，返香港接住就去雲南拍戲，再去俄羅斯會合譚詠麟睇世界盃，志偉一向熱捧巴西，不過熱門球隊巴西同瑞士都和波，志偉話：「世界盃係咁，好慢熱，今年爆冷爆到阿媽都唔認得。」

劉心悠今日喺台上製作蝴蝶餅畫幫心情行動籌款，佢近日見到好多唔好新聞，例如好多人跳樓，患濕疹自殺等消息，認為情緒唔好要搵辦法，自己就會選擇去旅行減壓，如果好攰就會飛遠啲，佢話：「 好似早前拍完深宮計就去咗馬爾代夫，想令自己調整身體。曾經遇過壓力好大時候難以控制，收工返到屋企，睇到電視畫面好感觸就會喊咗出嚟，但喊咗出嚟就當發洩係好事。」而近期心悠媽咪就同佢一齊生活，可以互相照應，佢話：「媽咪係我頭號fans，我哋乜都會傾，佢都有追我拍嘅劇集。」

精選娛聞，喺晒《娛果》
http://fb.com/appledailyent