湖南衛視嘅《我是歌手2》熱播，鄧紫棋(G.E.M.)亦因為上咗呢個節目，事業更上一層樓，佢喺過去嘅9集入面，已拎到四冠三亞佳績，不過近兩集加入咗同佢路線好相似嘅大馬歌手茜拉，令賽果有變數。

上一集G.E.M.以周杰倫嘅《龍捲風》憑歌寄意，為佢同林宥嘉分手嘅傳聞，添上更多迷霧，最後被韓磊擊敗得第二，不過都叫贏咗等第三嘅勁敵茜拉。

據知聽晚播出嘅第10集，G.E.M.會著上小背心自彈自唱英文歌《Fallin'》，最後更會重奪冠軍，咁樣嘅話即係G.E.M.五奪冠軍，係贏得最多冠軍嘅參賽者，最後佢會唔會成為總冠軍呢?