上次日馬「幸運如意」被告甩貶落第五，好多馬迷都議論紛紛，不過呢種情況有晒白紙黑字嘅條例講明，馬會都係跟條例判決，嚴格嚟講並冇做錯。或者今次事件睇到既有條例存在一啲未盡公平嘅情況，馬會應要研究吓係咪應該改例堵塞漏洞。

其實唔只抗議改變名次點樣處理要檢討，喺閘廂不規矩嘅馬匹係咪要硬性退出，亦係要關注嘅問題。上次日馬「赤免寶駒」踢閘，獸醫初步檢查認為隻馬冇問題可照跑，好在隻馬咁啱甩咗蹄鐵，喺重新釘甲時被釘甲師傅發現馬腳踵咗，獸醫先醒覺隻馬唔適宜出賽。若果「赤免寶駒」照跑，睇怕都輸咗九成，投注咗嘅馬迷真係多得釘甲師傅打救，唔使輸冤枉錢。

其實好多時馬匹入閘後發脾氣，普遍都會拉返出嚟行幾步畀獸醫檢查，單憑獸醫望幾眼，係咪真係可以確定隻馬冇整傷腳？今次「赤免寶駒」退出就證明咗獸醫係有機會睇錯，若然隻馬冇明顯嘅傷口，隻腳腫脹呢啲情況就未必睇到，畀隻馬繼續出賽，對投注人係完全冇保障。

有理由相信，過去獸醫亦存在睇漏眼嘅情況，只係一直冇人為意，既然淨係靠獸醫喺閘前把關唔夠，喺閘廂內有問題嘅馬，馬會係咪應該盡量安排退出，等佢哋閘廂測試做到滿意先出賽？夾硬畀啲可能有健康問題嘅馬跑，對人馬安全同投注人利益都有害無益。

阿Joe