鄧洢玲（阿旦）、RubberBand、麥子樂等，噚晚喺西環出席腕表活動，RubberBand擔任剪綵嘉賓。見阿旦瘦咗好多，佢笑話自己瘦到連個胸都縮細咗：「最近做Gym同學跆拳，因為年底要拍動作片，想手腳靈活啲，唔想太重磅，唔知自己瘦咗幾多，但都有啲肌肉，想練馬甲線，人生點都要試一次，華麗一次，o依家未明顯，得少少線條，想試一次鍛煉得好fit，到時影輯靚相。」

阿旦仲話11月會有一個相展，自己係其中一個模特兒，想影相靚啲：「想練到線條但個胸又會縮，真係魚與熊掌，但我想試一次瘦，雖然有時影相豐滿啲係靚啲，但我嘅身形比較細粒，fit係好啲。」

另外，麥子樂同英皇約滿後，轉簽咗古天樂公司，佢話想同古仔、佘詩曼合作拍電影：「之前同阿佘合作過3部劇，好期待再合作，好多時拍劇我都會問佢意見，開心同唔開心，感情問題都有問，佢從女性角度開解我，我朋友全部係男仔，想聽女仔意見，希望入到新公司喺電影方面有更多發展，自己好幸運得到好機會，所以要好好打握。」

精選娛聞，喺晒《娛果》
http://fb.com/appledailyent