九龍西潮汕文化節今年邀請咗潮人高永文醫生同民建聯鄭泳舜做推廣大使，香港港九龍潮州公會主席馬介欽話呀，高醫生棄官從醫，都仲關心潮籍社團活動，非常難得，又大讚新世代潮人鄭泳舜年青有為。

兩位推廣大使今日喺宣傳活動上露兩手，即席示範煮潮菜，包括豬脷冬笋煲同潮式湯丸。潮安人高醫生話呀，需要承傳潮州文化，唔好覺得潮州文化老套，因為呢個係大家嘅根。

鄭泳舜家鄉則係潮陽，佢話由細到大都覺得潮州人好團結，又話唔覺潮州男人好大男人，香港出生嘅佢話年幼時同嫲嫲同住南山邨，聽到最多嘅潮州話係「隻碰」、「水益」，當初都唔明，只禮貌回答「巴喇」、「呵」，然後繼續做自己嘅嘢，笑指嫲嫲有啲勞氣，後來就習慣咗。

佢邀請市民12月16日到土瓜灣遊樂場參加九龍西潮汕文化節，感受一下潮氣。