【財經論壇】區塊鏈可助HKTVmall點金成鑽（梁永熹）
蘋果日報 2020/09/09 00:30
梁永熹財經論壇區塊鏈HKTVmall
網購會逐漸取代傳統嘅商業模式，可否點金成鑽，就睇能否將大數據同區塊鏈配合發展。
在家工作期間，每星期都會聽到太太抱怨：「樓下管理處話HKTVmall送貨，但送咗成個鐘都未派到我哋！」筆者通常用逆向思維分析：同屋苑嘅訂單好多，即代表物流分配做得好，因為一個送貨員可以喺同一地區處理大量定單。
與其話王維基有點石成金嘅能力，筆者更相信羅馬非一日建成。HKTVmall上半年轉虧為盈，可能因為新冠肺炎疫情下，網購成為生活日常，之後係咪可以持續，就視乎疫情放緩後的市場走勢。無可否認，時勢的確造英雄。HKTVmall挾着疫情發展，規模越做越大，已成為香港網購龍頭。
簡單去睇，HKTVmall結合O2O經營模式及新零售嘅優勢——萬事以消費者體驗為中心。除咗王維基本身嘅個人魅力及其對傳媒嘅觸覺，HKTVmall早期已經投入大量資金建立強大嘅基礎建設，包括平台化嘅商家系統同物流系統、超過50間O2O門市、擁有自設車隊同3個物流據點等，均為業務提供穩固根基，變相有極大嘅潛在發展空間同營運彈性。
另一方面，佢一直將客戶體驗放喺首位，勇於革新營運模式。嚟緊會開放網站畀商戶同KOL開專頁、建立數據共享庫供不同企業使用，加埋外賣功能及推出電子錢包等，相信佢正朝住「港版美團」嘅方向發展。機會係留畀有準備嘅人，呢種前瞻性同強大嘅執行力係佢成功嘅重要因素，抵個股價狂升嘅。
凡事睇兩面，一方面享受到規模經濟帶嚟嘅利潤，另一方面就要面對唔同競爭者加入、日常用品市場飽和、物流人手嘅不穩定，保持龍頭地位及開拓不同市場將會是佢將要正視嘅挑戰。
講到網上平台最核心、最值錢，往往唔係介面及貨品，而係「數據」。要成功就要識利用大數據睇穿客戶及市場走勢。例如客人嘅消費習慣，鍾意睇咩類型嘅貨品，咩貨品會即刻落單，咩貨自取咩貨派送。
好似筆者太太會將泰國米同幾千蚊嘅面霜一齊checkout，呢件事筆者未必知，但平台卻一清二楚。呢啲大數據令HKTVmall能更加針對性地落廣告，未search就已經見到心儀產品嘅廣告，甚至本身唔想買但因為廣告或者相關產品推薦而消費，方便得嚟又有啲恐怖。
要做大數據分析，資料完整性及真確性相當重要，呢個焗蛋糕嘅黃金比例，王生又點會唔知。然而，水能載舟，數據能帶領公司逆流而上，若稍微處理不當，即使是Facebook這類巨企，都會因為私隱外洩等醜聞捲入大小訴訟、被罰款，甚至被用戶唾棄。
資料儲存及處理必定係HKTVmall跟住落嚟嘅一大挑戰，而區塊鏈技術正可以解決到呢兩個問題。
區塊鏈有去中心化嘅特質，唔會好似傳統server一死就無晒啲資料，區塊鏈上的數據無法被篡改，擁有可追溯性。每一項數據改動都會記錄在案，可助企業不同部門核對及確保資料完整性。而且，放上區塊鏈嘅數據會先用精密嘅計算方式進行加密，要hack到客戶同商戶嘅私隱資料絕對困難。長遠嚟講，配合區塊鏈技術去進行大數據分析，可以提高企業嘅可信度、競爭力同影響力。
總括嚟講，網購係香港零售業未來大趨勢，會逐漸取代傳統嘅商業模式，市場都會汰弱留強。最終可否點金成鑽，就睇能否將大數據同區塊鏈配合發展了。
區塊鏈科研創辦人及行政總裁梁永熹
-----------------------------
【全球樓行】 Dream House零距離
屬於香港人的移民攻略
-----------------------------
上車必讀天書 「九成按」入市懶人包
點擊即睇《按揭必讀手冊》電子書
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！