鄭雨滇研訊期間被董事要求提交過去幾年戶口同財務紀錄，佢拒絕服從呢項指令被停牌半年。阿滇被停牌，睇怕佢早有心理準備，但呢次事件就話畀大家知，原來賽事規例賦予競賽小組嘅權力都好大，唔單止可查騎練手機，仲可睇埋戶口紀錄，核查埋當事人嘅收入同支出。

喺維持賽事公平的大前提下，競賽小組有相對大嘅調查權力絕對唔係問題，既然有特權做嘢，就唔好收收埋埋唔用。家陣電算機臨場起飛着燈已經成為常態，某啲馬次次都係飛到馬到，騎師喺落重飛嗰場，表現就特別神勇，到冇落重飛嘅時候，騎師即刻手軟腳軟，走去死位塞車、慢閘外遊蝕位乜都齊，跑法令人非常不安。

針對臨場落重飛馬匹騎師嘅飄忽表現，競賽小組就應該運用條例賦予佢哋嘅權力，查吓呢啲騎師嘅手機，並叫佢哋提交財務紀錄查吓。小組今次捉到華人騎師有問題，應該一併查埋外籍騎師有冇出蠱惑，話唔定一查就釣到大魚。其實小組可以好似平時賽日抽驗禁藥咁，每次突擊抽查部份騎師嘅手機，有懷疑就叫騎師交出財務紀錄。

若競賽小組有咁大權力都唔做多啲功夫，變相證明一直以嚟包庇護短、處事唔公道嘅公眾指控成立。權力越大責任越大，希望小組快啲開始抽查行動。當然，阿滇出過事，其他騎師都會格外小心，避免被小組搵到證據。

阿Joe