個半月前（11月25號）叫買百利保（617），到家陣升咗接近30%，大幅跑贏同期大藍籌，百利保現水位，仍然勁抵買。
百利保自家揸住嘅香港仔鴨脷洲豪宅項目，樓面27萬平方呎，仲有北京朝陽區大型綜合發展項目，應佔樓面挨近200萬平方呎，全部都係透過聯營入賬，聯營公司最新賬面值6.2億銀。就當上邊兩個項目平分聯營數額，計計數，鴨脷洲項目每方呎樓面入賬1160蚊，北京項目每方呎樓面都係得157蚊，有冇平得咁交關？兩個項目賬面值，遠遠低過市價，亦即係話，百利保增值潛力唔嘢少。以聯營增值3倍到25億銀計（只係代表鴨脷洲每方呎樓面4640蚊），絕對合情合理，但百利保每股已經增值0.18元，係現價（0.27元）66%。百利保重秤後NAV，起碼上到1蚊，現價折讓高達73%，以舊年高位0.41元做目標價嚟計，NAV折讓仲挨近60%，現價追入，仲有翻半番利潤。

四通短打博升兩成

四通控股（409）最新NAV1.57元，現價（0.83元）折讓47%，無論以醫藥或者IT股分類，有咁嘅折讓，四通吸引到爆。又四通家陣揸住嘅證券投資，保守計數，已經可以為四通增值過3億銀，股市一回穩，四通嚟自股票增值，又唔講得笑。四通呢期跌到落250日線，已經有支持，兼且對上兩個交易日交投先行，上到近千萬股成交。呢轉短打博升兩成，四通價見0.99元，未有耐到NAV水位。