雷神、潘頓以走位精靈見稱，蘇兆輝就以鞭打狠勁聞名，各有所長，前次賽事潘頓五捷，上次雷神三捷，今次賽事（23日）睇牌面輪到蘇兆輝最惡，騎師王非佢莫屬。最大機會當數「放馬過來」，此駒換上蘇兆輝威力大增，有力贏馬交代。

列陣第二場四班2000米的「放馬過來」，來港至今31戰只獲一勝，數字已顯示是難出頭馬，上季三班65分在史卓豐胯下，用留前鬥後戰略贏1800米，其後演出下滑，季尾階段馬房安排華將上陣旨在減分。

「放馬過來」今季54分起步，相比上季贏馬已調低11分，前仗田草1800米配巴度，終點前一步被「千金一諾」所擒，上仗初跑泥地1800米，重配史卓豐，鬥輸畀廐侶「旅遊首席」跑第三，肯定評分屆反彈水位，而只欠一位硬功騎師發揮，今仗找來蘇兆輝正是求仁得仁。

再睇四班1800米最快要等到一月六日才有賽程，馬房既肯挑戰2000米，亦認定體力及氣量可以應付才報名，同組對手平平無奇，黃金機會在此。