張智霖（Chilam）同陳慧琳（Kelly）噚日到銅鑼灣出席月餅活動，Kelly話原本打算中秋約幾個家庭一齊露營，不過呢排成日落雨，加上又有登革熱，所以決定取消，改喺屋企客廳露營。Kelly話兩個囝囝已經開學，要開始幫手睇功課。
講到謝安琪個仔已經11歲，但依然會一齊沖涼，兼會灌輸性教育，Kelly就話：「我唔會同佢哋沖涼，𠵱家我着住長tee短褲，大仔（蝦餃仔）已經遮眼大叫，我要解釋有着褲。但係佢自己就會剝晒衫褲喺度跑。」Kelly仲話阿仔對性方面未好奇，到好奇時會將個責任交畀爹哋，等佢哋父子慢慢傾，唔會尷尬。

張智霖叫魔童18歲生仔

另外，大會安排兩位嘉賓同兩位小朋友一齊出場，Chilam好輕易就一手抱起兩個小妹妹。Chilam同靚靚（袁詠儀）結婚多年，不過只係生咗一個仔魔童，問佢係咪想生個女？Chilam笑話：「唔使，玩人哋嗰啲好，𠵱家阿仔11歲，7年後佢18歲，生個孫畀我湊，永遠有個10歲以下嘅小朋友喺身邊，會好幸福同有活力，但阿仔一定唔肯。到時我50幾歲，人哋可能會以為我係個孫嘅哥哥。」講到早排做咗老花手術，佢笑話𠵱家睇嘢清晰好多，先至發現原來老婆係咁靚。
撰文：馮仁昭