北京奧運前晚開幕，噚日正式比賽，吸引咗唔少市民買定薯片，留喺屋企舒舒服服攤喺度睇奧運，但係又有唔少人約埋朋友一齊睇，又叫又嗌有氣氛啲。小妹噚日去咗會展嘅高級視聽展，現場唔少參展商直播高清奧運（圖），有啲用投影機播放，220吋大畫面，吸引唔少人圍觀。小妹見啲運動員肌肉賁張，真係好震撼。直播中國女籃比賽嗰陣，中國隊入咗球，全場嘅人一齊歡呼，好鬼熱鬧，搞到視聽展變咗京奧嘉年華。

電器連鎖店泰林負責人鄭先生話，啲電視機唔熄得㗎，一定要直播奧運畀啲客睇，一熄電視機，啲人就走晒。佢話，現場啲客見到高清畫面咁靚，都有唔少人扑槌買高清電視機，仲係全高清機，尺寸更加選擇到50吋㖭，「全高清電視過去半年平咗一半，好似50吋全高清LCD，半年前賣四萬幾，𠵱家賣兩萬蚊，40幾吋都係一萬蚊。」
奧運效應帶動，現場高清電視固然好賣，高清機頂盒需求更加大，場內噚日幾乎賣斷市。售賣PixelMagic嘅視科老細Nelson話，啲影音發燒友一嚟到會場就係睇奧運直播，咪即場示範部機畀佢哋睇，仲示範埋互動電視服務，㩒個掣可以睇到奧運獎牌榜。代理「8仔」嘅聯興電業銷售經理鄧偉強話，拜奧運所賜，場內機頂盒噚日賣斷市。
電郵：mailto:[email protected]
逢周六、周日刊出