頭先講到祥嫂上咗去dbc接受吳綺莉訪問，點知問到母親節點過，佢就話想收七個契仔，將來行動不便都有人推輪椅，唔好旨意啲「紅衛兵」咁話。

問佢有冇同鄧兆尊、鄧小艾聯絡﹖祥嫂聽到仔女嘅名就即刻話：「下！我一下就轉話題囉喎，我哋要顧全大局，顧住人哋個節目，雖然我同佢(吳綺莉)唔熟，但我認為佢對兒女嘅態度同行為未夠同未到，你一個(小朋友)唔使搞到神魂癲倒，好似癲婆咁，o拿，我四個搞到我幾瀟灑，有聰明有智慧咪去面對、去承擔，又塞唔番入去嘅，講多都無謂，咪唯有面對承擔，媽咪有咩錯，有咩疏忽大意咗你呀，講丫嘛，萬事好商量，唔使下下揭開肚皮通街揚，呢啲叫家醜，冇必要下下要公開，以不變應變，靜觀其變，啲細蚊仔要發癲咪由佢囉，入世未深，何必同佢一般見識啫，又攞嚟激氣，咩都好，事在人為，當年我啲紅衛兵仲有埋智囊團，兄弟姊妹嚟圍攻我，傳媒又嚟傷害我，不過我明事理。」

吳綺莉表示喺節目中，會同祥嫂大談人生經驗，如何同子女相處。對於祥嫂話家事唔好公開講，吳綺莉話：「依家小朋友物質太豐富，冇捱過，父母當係寶，令到佢哋冇晒價值觀，係父母同社會負責，以前我哋係企定定畀媽咪鬧。」

有冇同囡囡吳卓林聯絡﹖佢話聯絡到，不過暫時未有同卓林傾偈，因為佢自己最近開始忙畫畫：「好快幫一個團體，將『弟子規』由文字變成畫，咁樣會吸引小朋友多啲，我自己都好鍾意入面嘅人生道理，預計要花一年時間去畫。」會唔會叫埋卓林一齊畫﹖吳綺莉表示唔會，反而會叫卓林一齊義工。