【大坑火龍傳人】72歲火龍總指揮：「終於可以瞓覺好。」
蘋果日報 2018/09/29 00:05
大坑舞火龍陳德輝國家級非物質文化遺產項目代表性傳承人
自1880年，大坑為消除瘟疫舞出首條火龍，至今138年。
72歲的總指揮陳德輝(輝哥)是為第三代繼承人，也是國家級非物質文化遺產項目代表性傳承人。七十年代中，廿多歲已被叔伯兄弟推舉為大坑舞火龍總指揮。傳聞，這位總指揮，比火龍更好火。
72歲的總指揮陳德輝(輝哥)是為第三代繼承人，也是國家級非物質文化遺產項目代表性傳承人。七十年代中，廿多歲已被叔伯兄弟推舉為大坑舞火龍總指揮。傳聞，這位總指揮，比火龍更好火。
年年都來為活動拍照的攝影師許有達：「見過有人喺會場吸煙勸不聽，輝哥用大聲公叫晒街坊、警察、觀眾，捉個人走。」
火龍教練黃祖銳：「可能佢以前當過兵，下命令又快，又大聲，似在操練。大家以為佢惡，其實唔係，只係慣咗。 」「佢要求好高的，好似龍頭的弧度造得唔夠圓，個龍口唔整齊，就要再整過，整到滿意為止。」
大坑舞火龍首個音樂組女組長朱自然：「佢俾我玩音樂組。不過我有時束起衫腳露咗肚臍，就會俾佢話，叫我哋唔好捲袖、唔好整到件衫亂七八糟，要有番個隊形。咁其實輝哥個人都挺講道理的。」
9月25日追月夜，輝哥依然由頭帶到尾，指揮最後一晚火龍走向。見他紮個馬叉住腰站在浣紗街中央，百幾二百人頂住插滿香冒着煙的火龍舞到他跟前。喂，霸氣。
大坑長大的男兒，細細個就執住花燈，領着火龍走。到十幾歲有氣有力，就會幫手舞龍：「以前唔舞火龍，會俾人笑㗎！」輝哥的青春年代，要紮全長220呎的火龍，大坑全民皆兵，客家人上山採珍珠草，手作大花牌，一年兩星期大假全花在火龍上。三日盛會都是六點多就出來做準備，半世紀，都未食過團圓飯。阿嫂唔詐型?「詐乜？佢都要做，幫手車旗仔車到手指痛。」
大坑長大的男兒，細細個就執住花燈，領着火龍走。到十幾歲有氣有力，就會幫手舞龍：「以前唔舞火龍，會俾人笑㗎！」輝哥的青春年代，要紮全長220呎的火龍，大坑全民皆兵，客家人上山採珍珠草，手作大花牌，一年兩星期大假全花在火龍上。三日盛會都是六點多就出來做準備，半世紀，都未食過團圓飯。阿嫂唔詐型?「詐乜？佢都要做，幫手車旗仔車到手指痛。」
社區轉變 希望吸引更多人認識火龍
傳統上只得大坑男兒先可以舞火龍，女生可以舞蓮花燈。除了因為單是個插滿香的龍頭都重八十斤，起碼要百幾個壯男輪番上陣，不是想玩小圈子，係因為「爆棚」，輝哥：「以前家家戶戶生三五七個小朋友，多人到唔夠玩添呀。而家啲人寧願養貓仔狗仔都唔養細路仔，我80年代都諗定將來若唔夠人，都會放其中幾截龍，俾女士們一齊舞。」2014年，出現了首個音樂組女組長朱自然，今年還跟賽馬會香港非物質文化遺產公眾教育計劃，「龍的傳人」服務研習活動合作，與鄧鏡波學校，張祝珊英文中學，佛教何南金中學合作，讓四十多位師生，齊齊舞火龍。長春社文化古蹟資源中心合作項目主任劉先生：「而家大坑個社區多咗新樓，多咗區外人搬來。輝哥都由十年前想吸引區內後生仔，變成想吸引多啲人認識呢個活動了。」
他還挺懷念過去的日子：「五六十年代大坑冇咁多街燈，冇咁多食店。夜晚成條街盡黑，舞起火龍嚟好靚。」年年中秋都令大坑逼滿人，逼了半世紀。五十年來活動前幾星期準備之時，佢都會失眠眼腫腫，全村人都知佢越接近盛事，就越嚴格執着：「唔係緊張呀，但太多嘢搞，總係心掛掛。」「對好多人嚟講呢個係個節日，對我哋嚟講係前輩留下的傳統。好多前輩八九十歲，篤住枴杖都要參與。村民老的老，搬走的搬走，你少了個聚焦，就少咗個聚集的機會。」其實講來講去，不過因為他好緊張這條代表大坑，幾代街坊都期待的生猛火龍。
記者：陳慧敏
攝影：龍天佑、林亦、黃智琳、廖璟熹
攝影：龍天佑、林亦、黃智琳、廖璟熹
輝哥：「我一個人對咁多人，又多嘢做，你講嘢細聲係聽唔到的。就講大聲啲，快啲。但唔係惡。」
火龍全長220呎，舞一次最少130人輪番換手，以前還可以多達300人，係聚集大坑人的焦點。
已經搬到西貢的朱自然，打風時家裏受災七國咁亂，都要回來幫忙搞好個活動，才回家慢慢執。
黃祖銳年年幫忙紮作火龍，珍珠草一定要曬得夠乾防發霉，龍身粗幼一定得統一，弧位一定要夠圓夠對稱，否則都得重做。
插了香的龍頭重80斤，而「起龍」一刻，起碼要100磅力度才能將龍頭從鐵架抬起，跑十來廿步就得換手。