呢個世界有啲連命都可以唔要嘅人，車路士位「喪爆」隊長泰利就係呢類人，因為醫生明明勸佢暫時唔好頂頭槌，佢都一於當耳邊風，照樣頂到啪啪聲！
呢幾日泰利積極練習，仲要求領隊摩連奴周三聯賽對曼城畀佢上陣；可能為證明自己好番晒，呢位硬漢見親高波都跳起喪頂，仲頂入咗幾球；初時隊友睇到呆晒，之後就大聲笑，真係要寫個服字畀佢。
所謂臭味相投，口臭領隊摩連奴就係鍾意泰利夠喪，周三好可能真係派佢上陣。至於摩連奴上場英足盃對熱刺鬧球證單嘢，英足總決定唔追究，不過呢位葡萄牙狂人，周一話完成「車仔」份約後，希望有幸執教皇馬！

車路士會方聽到佢呢番反骨言論後，隨即發表聲明感憤怒。摩連奴又係唔抵幫嘅，一邊𢭃緊「車仔」人工，一邊話希望教皇馬，唔嬲就假啦！
當然，「車仔」會方亦早有打算，嗱嗱臨搵定班主力續約，以防第日摩連奴走佬嗰陣拉人過檔，周二即時宣布同中場主力艾辛續約5年至2012年。