現年34歲嘅糖兄（潘雲峰）噚日同拍拖8年嘅女友阿Miu（繆家明），喺尖沙嘴舉行結婚酒會，拍擋糖妹（黃山怡）做司儀外，好友蔡恩真、陳柏宇及蔡穎恩等到賀，阿Miu仲谷出3吋事業線。糖兄喺現場同老婆恩愛咀嘴外，又同隊band唱咗首佢作嘅歌《我要結婚》送畀老婆，真係冧到爆。

糖兄話明婚後好多工作，所以要遲啲先生BB，仲話自己係一個好丈夫，點知老婆阿Miu就話： 「希望繼續Keep落去。」 暗裡仲叫佢好自為之。咁嚴重？

嗱嗱嗱，結婚係開心事，不過呢，糖兄妹成軍以來，大家焦點都係難以避免地擺咗喺糖妹身上，hmv嗰張價錢label仲毫不留情地將糖兄完全「河蟹」/「屏蔽」咗；就連無綫《勁歌》總選，糖兄亦被列入爭「最受歡迎女歌星」獎。今日糖兄終於坐正，做第一男主角，糖妹就負責做司儀，做訪問嗰陣仲揸咪一齊訪問糖兄添。

恭喜糖兄糖嫂！



「第八屆金話梅電影選舉」又嚟喇。今年除港產片有獎攞，仲增設「最爛合拍片」獎。栢芝憑四套電影入圍「最爛女主角」，應該冇得輸。大家快快投票啦，結果將於4月12日在《蘋果》娛樂版揭曉。

公投網址： http://facebook.com/AppleDailyGoldenPlum