由天下一電影發行、創意香港資助，新晉導演譚惠貞執導、劉嘉玲首任監製及連同吳肇軒主演、謝君豪、董瑋、余香凝、劉天蘭等演出的第二屆「首部劇情電影計劃」得獎作品《以青春的名義》較早前於10月31日舉行咗首映禮，其後又舉行咗五場優先場，觀眾評價正面。

導演譚惠貞搵嚟影后劉嘉玲擔當女主角並兼任監製，戲中嘉玲與老公婚姻出現裂痕，而男主角吳肇軒飾演嘅中學生將對母親嘅掛念投射到劉嘉玲飾演嘅代課老師身上，兩人喺戲中泳池邊跳舞傳情，令到兩人糾纏不清關係曖昩，而喺嘉玲當面揭發老公嘅婚外情化後，因為心情低落而將自己困喺房內，軒仔大膽潛入房間並爬上嘉玲床上，觸發兩人潛藏已久嘅複雜感情。

軒仔曾喺之前嘅訪問中多次提到嘉玲係佢少年時代嘅女神，尤其係對方喺《阿飛正傳》嘅演出更令佢神魂顛倒，今次同嘉玲拍攝床上戲，軒仔表示：「其實唔好將呢場定性為床上戲，只不過係劇情需要咁發生嘅戲份，不過今次同嘉玲姐咁近距離接觸，心情唔多唔少都有啲緊張嘅。」

劉嘉玲則表示嗰場唔單止係床戲，更有好多層次喺裡面，佢直言：「嗰場戲係人性大爆發，除咗係對於老公背叛嘅宣洩之外，更加係情緒壓抑咗咁耐嘅釋放。其實每個女人喺生活中都好渴望被愛，好渴望得到溫存。」

更多娛聞，喺晒《娛果》
http://fb.com/appledailyent