化妝品龍頭的莎莎（178）本港分店開至成行成市，但原來老闆郭少明1989年時曾經移民，偏偏香港人基因太深，創業時經常「朝十晚三」，難接受移民生活平淡猶如「等死」，最終「頂唔順」3日後即決定回流本港繼續發展莎莎。

郭少明的經歷與80年代電影《富貴再迫人》不謀而合，年輕讀者可能沒看過此電影。正值回歸廿周年，郭少明回首當初，壯年時也曾與太太趕上這「移民潮」，遠走多倫多，但幾經轉折最終還是落葉歸根，不禁失笑。

郭少明問記者：「你想聽故仔？」40年前的經歷就似小說一般，當年郭少明與太太羅桂珍創立莎莎並無經周詳計劃，而是偶然下，郭太想頂下一間僅得40呎大小的細舖，該店寶號正是「莎莎」。

「莎莎」頂手費兩萬元，銀碼之大，郭少明指「據我知道當時可以買層樓」，只是一名打工仔的他反問太太：「錢從何來？」加上當時並無男士從事化妝品行業，故只敷衍太太一句，「你喜歡就做啦！」豈料郭太行動迅速，用存款及從外家籌錢，兩周後已帶他落商場睇舖，二人正式升格做小舖老闆。

向來是愛妻號的郭少明亦樂於「日日陪老婆」：「佢去執野，我又幫佢手去執野，賣完嘢我去幫手補貨。」慢慢變身成莎莎第一代買手。

自1978年起，郭少明日頭幫太太賣化妝品，夜晚返政府工，幾乎日日做足18個鐘，直至5年後公司生意穩定，他才辭去政府工全職投入。莎莎亦由原本只是銅鑼灣總統商場一個最細的舖位，其後頂手鄰舖擴充，3年內一間變兩間，「總之人哋唔做就我地做，個時無計劃」。

莎莎起初發展順遂，直到1989年遇上難關，總統商場舖位業主大幅加租四、五倍，更限郭氏兩星期內回覆。當時郭少明覺得太貴兼事忙，晚了回覆，豈知對方已轉租他人。他形容事件就似「一盤冷水淋落頭」，最終惟有安撫員工，計劃轉做街舖。雖然街舖租金較商場貴六、七倍，卻令郭少明上了一課，「街舖物有所值！生意亦多了六、七倍。」是次經驗亦令他由滿足現狀的小老闆，慢慢了解莎莎的潛力，開始有計畫地加開分店。

然而，當年六四事件，亦曾令郭少明一度停步，他憶述：「89年六四個陣我都有想過移民，兩公婆想去多倫多」，他指有這念頭全因當時整個總統商場的老闆都想移民，「隔離左右好多都計數，賣咗啲舖，揸住幾多百萬買層house（洋房），啲錢收息就夠養自己囉」。

郭少明笑言是受人影響，「個個都講到好興奮，我都有啲興奮。」就這樣帶著一家移民多倫多，誰知過去3日「就走咗喇」。「我唔習慣！我同太太由朝做到晚，每日由10點做到凌晨3點，而移民的日子只需要諗『邊到入油平，邊到買可樂平3個仙』，係等食飯無嘢做。」其間進行最多的活動是睇樓。

郭少明自言家族4、5代人，都帶著香港人勤勞的基因，不嫌辛苦，變通又快，雖然他本身已取得移民證，「但有一晚我哋兩公婆突然一齊彈起，個時仲好後生，我話我哋係咪係到等死？如果等死不如返香港等呀！」兩人同意「頂唔順」移民生活的平淡休閒，故翌日即回流香港，「返香港好開心！以後都唔會再諗移民！」

記者：方楚茵

掌握財經生活資訊，即Like「蘋果ATM」fb專頁啦！
http://fb.com/appledailyatm