由韓國神劇《太陽的後裔》女星宋慧喬孖朴寶劍主演嘅tvN新劇《男朋友》上月28號首播，即時掀起煲劇熱，大後日將播出第9集，港迷稍後可於「黃Viu煲劇平台」同步追睇。

《男朋友》講首爾市長嘅女兒車秀賢(宋慧喬飾)同平凡青年金振赫(朴寶劍飾)喺古巴相遇，兩人返回首爾後成為上司下屬嘅關係，繼而再成為戀人，喺本月20號播出嘅第8集，喬妹同朴寶劍仲上演劇中「初吻」，即時帶挈收視升。

有追睇開《男朋友》嘅劇迷都好奇到底喬妹同朴寶劍之後嘅愛情路會點走，其實睇返《男朋友》之前公開嘅海報同埋網民喺古巴捕獲嘅照片，可以預計喬妹同朴寶劍將會喺古巴重聚。當中頭一集，朴寶劍係以攣髮示人，當時唔少網民反應兩極，有唔少網民都大彈佢一頭攣髮，到第二集講朴寶劍返到首爾後就開始以短髮示人，而喺《男朋友》早前公開嘅海報，以及網民喺古巴捕獲朴寶劍時，都會見到佢嘅短髮造型，所以可以推測喬妹同朴寶劍之後嘅劇情將會喺古巴重聚，估計兩人呢段地位懸殊嘅戀情會受到唔少阻撓，唔知佢哋係唔係決定拋下一切，喺古巴再續前緣呢？

精選韓流，喺晒《娛果》
http://fb.com/appledailyent