否極泰來當施丹替身
求驗客手記:拿美爾明益杜加里

蘋果日報 2002/05/29 00:00


杜加里雖然俾人話佢係法國陣中最渣嘅球員,但偏偏𠵱家行情高漲,話可以喺揭幕戰對塞內加爾嗰陣,頂受傷施丹嗰位。
施丹家陣踢唔到對塞內加爾場揭幕戰,本來佐卡夫係最理想嘅替補人選,至弊佢年紀太大,今年三十有四,拿美爾驚佢冇九十分鐘嘅氣力。而米確、保賀斯恩同馬基列尼雖然當打,可惜國際賽經驗唔夠;搞吓搞吓,咁就無端端益咗杜加里。
杜加里雖然成日俾人鬧,話佢咁鬼渣,唔應該入選法國踢世界盃;但咁又點啫,佢打過一屆世界盃同兩屆歐洲國家盃,稱得上係老波骨之一,加上以前同李沙拉素同施丹一齊喺波爾多踢過波,默契咁好,拿美爾唔搵佢搵邊個呀?
查實法國同組對手烏拉圭、丹麥同塞內加爾喺實力,同佢哋有一段距離,施丹喺唔喺度,對佢哋影響唔大;如果施丹打唔到首圈,咪當留力打往後嘅比賽囉!

寄語「帥哥」保重身體
俗語有話財多身子弱,估唔到連靚仔都係周身病痛。早排撞爆鼻骨,醫咗好耐嘅國足靚仔中堅李瑋峰,由於中耳炎關係,搞到喺禮拜一,唔可以同其他隊友作正式嘅練習。我求大俠奉勸佢要保重身體,事關佢係國足後防嘅支柱,若然佢有乜頭暈身㷫,分分鐘影響中國嘅出線次圈機會。

「法網」生不逢時
我求大俠見收費台冇乜宣傳今屆法國網賽公開賽,重以為冇得睇,原來佢哋安排咗喺A台播。世界盃係四年一度嘅盛事,所以真係唔怪得收費台咁大細超。今屆法國公開賽同世界盃撞到正,只好怪生不逢時啦。
開鑼在即流料滿天飛
世界盃重有兩日就開波,進入最後衝刺階段,好幾支球隊好似瑞典同中國咁,都作閉門練習,唔接受傳媒採訪。之但係,𠵱家重有好多料流出嚟,好似話碧咸會喺對瑞典場波打正選,同埋丹尼臣會取代李華度上陣對土耳其,至於可信性有幾多,就要留番俾讀者自己判斷嘞!

傑特向敵隊擁躉還以顏色
塞爾特人班擁躉認真冇品,喺噚日場波當傑特控球在手時,就齊齊大唱:「打老婆嘅人!打老婆嘅人!」(諷刺傑特上年打老婆被捕事件),激到傑特眼火爆,怪唔知得喺贏咗波之後,立即向班塞爾特人擁躉還以顏色,做咗兩個V字手勢,表示二比二打成平手;打老婆係唔啱,不過人哋痛改前非,今次又抵傑特得戚番次。