金像影帝占美霍士（Jamie Foxx）於星期六喺西荷李活一家餐廳食飯期間，捲入一宗打鬥事件。據美國娛樂網站TMZ透露，占美當時同友人坐喺餐廳室外地方，有食客唔滿意佢哋太嘈，所以行去占美度叫佢哋細聲啲，仲話「你唔好惹我，我來自紐約。」占美嘅友人就以「Ｘ你」回應，該名食客開始動手，期間占美被推倒，又有人稱占美其後將食客制服。

占美今日於Instagram拍片回應打鬥事件，佢用條毛巾掩着右眼話：「大鑊，傳開哂，仲有埋片。我只係想同大家講番發生乜事。」之後佢就移開毛巾，整出鬥雞眼，相當搞笑。佢話只係開個玩笑，2017年唔想有暴力發生，唔想有人受傷，仲話如果想睇佢打人，記得要去睇佢新片《Sleepless》，順便宣傳新戲，真係服咗佢。