日本混血女星Becky前日被《週刊文春》爆佢同上位樂隊極品下流少女主音川谷繪音搞不倫之戀，由於Becky一直形象良好，今次被爆做小三就轟動日本。

川谷同圈外人妻子結婚幾個月，就同Becky拍拖，仲被爆喺酒店房拍嘅私密照，據知川谷隱瞞已婚人夫身份，但後來Becky知度對方已婚，但仍冇斬纜，被爆大鑊後佢立即開記招道歉。今日有日本傳媒指，二人因為知道搞出個大頭佛，於是喺事務所勸阻下立即分手，仲話唔會再見面。

擁有10個廣告合約兼主持多個節目嘅Becky，喺爆醜聞後，今朝首次做直播節目《彩虹色鏡頭》，整個節目入面佢都面帶笑容，同其他主持有講有笑，而且並冇提及自己嘅事，不過，有報道話佢喺節目開始前就向工作人員同山口智充等節目中其他主持人道理，指自己嘅私事鬧大，感到好抱歉，其他主持人都面帶笑容回應。不過，有觀眾認為佢應該趁住直播再向觀眾道歉喎。