自由黨直選無「梁」敗「北」失「辰」，全黨上下近日冇晒心機，政務司司長唐英年曾經係自由黨黨員，對個黨搞成咁都似乎感受良多，噚日出席一個酒會，被問到自由黨選舉失利時，好無奈咁攤開雙手，用身體語言表示冇嘢好講。

商人味濃影響特首路

選前自由黨計劃招兵買馬，選後一切休提，更傳出有人退黨，而盛傳會入黨嘅林大輝噚晚表示，暫時維持獨立身份好啲。有個別自由黨高層私下稱，該黨正、副主席直選出局，疏於地區工作固然係致命傷，另一原因係市民對官商勾結十分敏感，雖然未至於仇商，不過長毛、毓民得票高，某程度反映市民將不滿工商界情緒投射到社民連上，佢話如果情況不變，商人味濃嘅唐英年特首路會更難行。
另一政界人士則分析，董落曾上，北京對商人治港有新睇法，自由黨勢弱無疑影響唐英年聲勢，但是否出局言之尚早。賭王何鴻燊噚晚話，對選舉結果相當滿意；曾憲梓就話對結果「唔係好舒服」，因為自由黨代表商界，今次輸得難睇。