當年今日
關於我們

父親節送新歌《大小孩》
華仔提高EQ𠱁爸爸開心

蘋果日報 2003/06/15 00:00


今天是父親節,劉德華特別錄製新歌《大小孩》送給爸爸,願他開開心心。華仔日前接受本報專訪時,表示自己EQ不高,對愈親近的人反而愈易發脾氣,但本着要令人開心的原則跟父母相處,兩代便能融洽相處。
親情篇--情深的一句
今天正值父親節,一向以孝順及勤力見稱的劉德華放工後,晚上會騰出時間陪父親吃飯。華仔與父親的感情相當要好,他日前接受訪問時,自言自己EQ不高,對愈親近的人,愈容易發脾氣,但他認為以凡事希望身邊人開心的原則與父母相處,便可生活得快樂與融洽。

住隔籬日日見
華仔為令父親開心,今年特地錄製新歌《大小孩》,及親筆寫了祝福語送給爸爸。華仔說:「歌詞係林夕寫嘅,內容主要係話父母不顧一切照顧子女,點解子女長大後,唔可以用心照顧變成大細路嘅父母?有時我見到一啲後生仔拖住啲老人家,個樣好唔耐煩,我覺得一係唔好拖,拖就拖得開心啲,陪老人家都一樣,佢哋有時係囉唆係煩,但你俾佢見到你唔耐煩個樣,佢哋咪重難過過你唔陪佢,何必呢?」
華仔與父母的住處相鄰,他還特地將兩棟房子的大廳打通,故華仔每日都可與父母見面,他還會每年騰出十天時間陪父母去旅行,所有安排都以父母為先,自己充當領隊也在所不計。

親手焗製蛋糕
華仔說:「其實唔使特別慶祝父親節或者母親節,只要我哋返屋企陪父母食吓飯,傾吓偈,佢哋已經好開心。」
華仔談到父親的軼事,難掩溫馨笑容,原來華仔父親甚有心思,某年於劉母生日前數天,特地到華仔住處焗蛋糕,他說:「我記得有一年我阿媽生日,老竇特登親手焗個蛋糕畀佢,當時我工人話識整,叫老竇唔使咁辛苦,等工人整啦,我老竇重好惡咁鬧佢話:『你識乜呀?』然後自己好有心機慢慢焗。你有冇發覺過時過節屋企食親飯,啲餸都一模一樣?嗰次就係多咗個蛋糕,即刻唔同晒,老實講真係唔好食,但我阿媽都猛話好好食,真係好好笑。」
溝通差好可惜
華仔表示父親的舉動其實是想身邊人開心,這種心態是對家人應有的態度,現時很多子女與父母溝通不好,父母多問兩句便會發脾氣,實在很可惜。
華仔說:「其實我EQ唔高,對愈親近嘅人愈容易發脾氣,但其實邊個唔想令身邊人開心?我有時間都陪老竇傾吓偈,講吓拍戲辛唔辛苦,八卦吓啲新聞咁,有時佢哋問你嘢,唔係真係想八卦,只係想同你講吓嘢,先搵嘢嚟講,你咪同佢哋傾吓囉,佢哋明㗎。」
不時有傳華仔已婚及有一女,華仔說:「如果結婚生仔要收埋真係好辛苦,咁我真係冇嘛。第時我結婚會用我嘅方法同渠道話畀歌迷知,但就唔會特登向傳媒交代。」
採訪:蔡如玉
攝影:仇志德
empty
《只要我哋返屋企陪父母,佢哋已經好開心。》
empty
華仔真誠地說:「結婚生仔要收埋真係好辛苦。」
empty
華仔每年都會跟父母(左二、三)去旅行,以表孝心。
資料圖片
empty
張開手去抱他
從前曾給他擁抱過嗎
閒聊時摸摸他白髮
童年時你亦撒嬌
別怕肉麻
節錄自《大小孩》