上周五美股唔多妥，估話港股都難逃一跌。個市就係唔輕易俾人估中，恒指不跌反升，期指升幅重大過恒指，有10點高水㖭。
地產股繼續生性，不過𠵱家去追地產股Call輪，有啲風險。恒生（011）同東亞（023）有進帳，滙豐（005）則微跌1格。個市若然見底，滙豐都會有份回升，吼吓滙豐Call輪搵食，有兩件可以諗吓，9792同9391。9792今年10月到期，現價52仙，溢價4.5%，槓桿率15.7倍。9391明年1月夠鐘，呢件係比聯出嘅鎖定回報輪，按發行商網頁提供嘅數據，溢價12%，有效槓桿率10倍。滙豐雖然郁動唔大，但兩件Call輪槓桿率唔細，波幅好勁，贏同輸都好快。

九倉Call輪冇值博率
九倉（004）收13.05元，升40仙，升幅3.2%，帶動兩隻九倉Call輪9476同9638打入10大龍虎榜。9476收2.2仙，升幅47%，隻輪6月到期，溢價8%，計埋正股除息因素，溢價實際接近10%，槓桿率59.3倍。睇吓槓桿率，成個刀仔鋸大樹格局，但要望正股有1成以上升幅，唔多實際，隻輪追唔過。9638明年1月到期，現價4.7仙，溢價33%，槓桿率27.8倍，又係買唔落手。九倉重有1隻Call輪9585，溢價21%又係冇得諗。九倉現價追唔過，所有九倉Call輪，都冇乜值博率。
章盛