當年今日
關於我們

【6千萬vs 4百萬票房】《葉問3》靠技術獎入圍 《點五步》一舉提名最佳新演員

蘋果日報 2016/10/01 19:02

最佳新演員葉問3點五步寒戰2金馬獎

第53屆金馬獎啱啱舉行咗入圍名單嘅記者會,由宋芸樺同李鴻其宣讀入圍電影名單。
港產片今年佔去唔少入圍席位,包括咗「宇宙最強」甄子丹嘅《葉問3》,喺最佳視覺效果、最佳美術設計、最佳動作設計、最佳剪輯呢四項技術獎到都有入圍,對於用強大投資製作嘅《葉問3》嚟講,絕對係有晒回報。另一套都係大製作,星光熠熠嘅《寒戰2》亦都喺最佳視覺效果同最佳動作設計呢兩項技術獎有提名,喺戲入面凶神惡煞嘅梁家輝,就有份角逐最佳男主角。
除咗高成本製作,《點五步》嘅男主角胡子彤亦獲入圍最佳新演員,之前《點五步》要拍膊頭借人借物資先拍得成,今次胡子彤可以提名已經好威水,唔知佢可唔可以好似上年白只咁,一擊即中呢?
對於提名最佳新演員,胡子彤接受《蘋果》訪問時話:「第一次拍電影冇諗太多,所有嘢對我嚟講都好新,由上映、謝票都係一個好好回憶,有提名都已經當贏。今次呢個提名唔係我一個人功勞,代表住成個《點五步》團隊,好開心,可以代表《點五步》去同其他戲角力。」佢仲話今次抱平常心,但就要多謝屋企人、《點五步》團隊同謝發行公司Golden Scene。」