呢個，係一個奮鬥的故事。

四位baby，醉心音樂，夢想開一場勁歌熱舞演唱會，由山頂到山腳都坐滿人，個個揮動螢光棒、高舉燈牌，高呼：SugarSugarBaby！OhSugarSugarBaby！

係，佢哋係FFx。

傳奇女王FFx今晚於麥花臣場館舉行演唱會，開騷前兩個禮拜，佢哋話:「380蚊同280蚊門票已賣晒，剩餘少量180蚊門票，公司預留咗俾我地哋每人兩張380飛，我哋會喺facebook同粉絲玩遊戲，只要粉絲喺我哋post留言講鼓勵說話，再tag朋友，最有創意就可以得到呢啲380蚊飛。」似乎真係萬人空巷，FFx距離達成佢哋個夢想，又進一步喇！

然而，今晚開騷…

場外先。
場外有紀念品賣，同紅館個唱一樣。$58一條毛巾，仲有唔使去蘭桂坊都買到嘅USB，$98。

場內呢，場館可容納3,500人，入場人數方面，肉眼睇得見嘅，大約300左右。肉眼睇唔見嘅唔知有幾多。點解咁講？下文會解釋。

晚上8點半開騷，11點完騷。FFx有咁多歌可以唱咩？有。《SugarBaby》，其他大部份是別人的歌，包括越級挑戰林憶蓮嘅《至少還有你》同埋G.E.M.嘅《Wheredidyougo》、Sammi嘅《信者得愛》等等。

即係咁，咁啱今晚大台播出一個籌款節目，一眾為善最樂嘅主席副主席們只要捐錢，就可以上台唱歌，無視觀眾聽覺視覺感受，同FF唱K無疑；同一時間，旺角麥花臣FFx，無疑也是四位BabyFF-ing。

一開場，四女身穿銀色「打歌服」登場獻唱《SugarBaby》，《MKPop》等首本名曲。唱完後四女忽然滿嘴英文，向現場觀眾大叫:"Putyourhandsup!","WhenIsayFF,yousayX！"又呼籲：「山頂嘅朋友，嗌大聲啲！」山頂明明得小貓三四隻——肉眼所見嘅就係。

但係，問心嗰句，現場嘅反應，係唔差。螢光棒、燈牌一樣不缺，觀眾亦表現熱情，同場仲介紹埋師弟達仔(唔係達哥亦唔係狄易達)同師妹Shadow登場，各自solo一首再合唱。

師弟師妹退場後，楊澤怡（Shirley）登場，自彈自唱佢有份編曲嘅《一生一世》，唱畢仲話:「好開心可以見到你哋，呢首歌係講結婚嘅…」台下即有歌迷大叫:「你！唔！好！結！婚！呀！！！！！」

唱完《一生一世》，FFx又合體唱鄧麗君嘅《甜蜜蜜》，台下有歌迷上前「利利是是」咁向四位Baby派利是~~~唱咗一輪，輪到握手環節，歌迷即衝上前，熱情地要求握手。真嘅，係真嘅。

FFx都好識做，到咁上下，落台，走入人群中，主動同歌迷握手。

詭異的事情又發生了。FFx突然又向山頂方向高呼：「山頂嘅朋友，你哋落咗嚟未？」

山頂明明得幾丁友………

是夜表演嘅除咗有FFx，仲有小朋友上台跳舞，然後四女又各自solo、同dancers跳咗4part舞，足足跳咗十幾分鐘，然後又唱下歌咁。

處女開騷，甩轆難免，蝦轆亦是。綜觀是夜演出，不離：走音、甩嘴。但舞步係明顯有進步嘅。

咁都好吖！即係下次有進步空間囉！